पारोळा (बारामती झटका)
पारोळा तालुक्यातील मेहू गावातील सरपंच आणि त्याच्या कुटुंबातील तिघांना लाच प्रकरणात जळगाव एसीबीने अटक केली आहे. या प्रकरणात सरपंच जिजाबाई गणेश पाटील, तिचे पती गणेश सुपडू पाटील, मुलगा शुभम गणेश पाटील आणि सेतू सुविधा केंद्राचा खाजगी पंटर समाधान देवसिंग पाटील यांना लाच घेताना रंगेहाथ पकडण्यात आले आहे. एकाच कुटुंबातील तीन सदस्यांना लाच प्रकरणात अटक झाल्याची ही जिल्ह्यातील पहिलीच घटना आहे.
2017-18 ते 2022-23 या कालावधीत मेहू गावाचे सरपंच असलेले 47 वर्षीय तक्रारदार यांनी ग्रामपंचायतीच्या व्यायामशाळेच्या बांधकामासाठी जिल्हा क्रीडा अधिकारी कार्यालयातून सात लाखांचा निधी मंजूर करून घेतला होता. 2023 मध्ये जिजाबाई पाटील सरपंच म्हणून निवड झाल्या. त्यानंतर तक्रारदार यांनी व्यायामशाळेच्या मंजुरीत दिलेल्या निधीसाठी सरपंचांकडे मागणी केली. यावेळी सरपंच जिजाबाई पाटील यांनी संबंधित कन्स्ट्रक्शन कंपनीसाठी चार लाखांचा धनादेश दिला आणि उर्वरित तीन लाख रुपयांचे धनादेश देण्याच्या मोबदल्यात लाच मागितली. तक्रारदारला एक लाख रुपये दि. 31 जानेवारी 2025 रोजी व नंतर 70 हजार रुपये लाच देण्यास सांगितले होते. त्यानंतर सरपंच पती गणेश पाटील यांनी 40 हजार रुपयांची लाच मागितली.
तक्रारीच्या तपासानंतर एसीबीने मेहू गावात बुधवारी सापळा रचला. खाजगी पंटर समाधान पाटील याने 40 हजार रुपये स्वीकारताना रंगेहाथ पकडले आणि त्यानंतर अन्य तीन आरोपींना अटक केली. आरोपींच्या अंगझडतीत 10 हजार 170 रुपये जप्त करण्यात आले.
जळगाव एसीबीच्या पोलीस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक नेत्रा जाधव, दिनेशसिंग पाटील, सुरेश पाटील, राकेश दुसाने, अमोल सूर्यवंशी यांच्या पथकाने ही कार्यवाही यशस्वी केली. एसीबीच्या सापळ्यामुळे एकाच कुटुंबातील तीन सदस्यांना लाच प्रकरणात अटक करून एक मोठा धक्का दिला आहे.
नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.
