पालकमंत्री जयकुमार गोरे यांच्या नेतृत्वात सोलापुरात भाजप काढणार 25 हजार कार्यकर्त्यांचा मोर्चा…

सोलापूर (बारामती झटका)

देशातील मोदी सरकारला सत्तेतून खाली खेचण्यासाठी काँग्रेस आणि विरोधी पक्ष अराजकता माजवत आहेत. फेक निरेटिव्ह तयार करून केंद्र सरकारला बदनाम करण्याचा डाव सुरू असून त्या विरोधात जनजागृती करण्यासाठी भारतीय जनता पार्टीच्या वतीने पश्चिम महाराष्ट्राचा सोलापुरात मोर्चा काढण्यात येणार असल्याची माहिती महाराष्ट्र राज्याचे ग्रामविकास व पंचायतराज मंत्री तथा सोलापूर जिल्ह्याचे पालकमंत्री जयकुमार गोरे यांनी पत्रकार परिषदेत दिली.

लोकशाही बचाव, अराजकता हटाव असा या मोर्चामागील विषय असून सोलापूर शहर आणि जिल्ह्यातून किमान पंचवीस हजार कार्यकर्ते या मोर्चामध्ये सहभागी होणार, अशी माहिती देताना पालकमंत्री म्हणाले, भारतीय जनता पार्टीला देशात, राज्यात आणि सोलापुरात जनतेने निवडून दिले आहे. तुमची डिपॉझिट जप्त झाली, तुम्हाला माहित आहे तुम्ही जनतेतून निवडून येऊ शकत नाही. त्यामुळे आता देशात अराजकता माजवण्याचा प्रयत्न सुरू आहे. उलट देशामध्ये आणीबाणी आणून देशातील 22 राज्यातील सरकार बरखास्त करण्याचे पाप त्यावेळी काँग्रेस सरकारने केले होते.

देशामध्ये सुरू असलेली एसआयआर ही प्रक्रिया उघड आहे. त्यावर हरकती घेतल्या जातात, दुरुस्ती केली जाते, पण कधी विरोधकांनी मतदार यादी वाचली आहे का ?, त्या यादीचा अभ्यास केला आहे का ?, असे प्रश्न उपस्थित करत एकीकडे तुम्ही डॉ. बाबासाहेब आंबेडकर यांनी दिलेली भारतीय राज्यघटना छातीला लावून आंदोलन करता. परंतु, त्याच राज्यघटनेमध्ये देशाच्या मुख्य निवडणूक आयुक्तांचा राजीनामा कशाप्रकारे होतो, हेच विरोधकांना माहित नाही. त्या राज्यघटनेचा प्रथम त्यांनी अभ्यास करावा नंतर ती हातात घेण्याचा अधिकार बळगावा, अशी टीका ही त्यांनी विरोधकांवर केली.

या पत्रकार परिषदेला आमदार देवेंद्र कोठे, आमदार राजेंद्र राऊत, माजी आमदार राम सातपुते, महापौर विनायक कोंड्याल, माजी आमदार प्रशांत परिचारक, माजी आमदार राजन पाटील, शहराध्यक्ष रोहिणी तडवळकर, सभागृह नेते नरेंद्र काळे, पूर्व जिल्हाध्यक्ष शशिकांत चव्हाण, पश्चिम जिल्हाध्यक्ष गणेश चिवटे यांची उपस्थिती होती.

नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.