महाळुंग-श्रीपूर नगरपंचायत प्रशासनातील भ्रष्टाचार, अधिकाराचा गैरवापर आणि निकृष्ट कामाच्या निषेधार्थ आमरण उपोषण
रणजीत नवगिरे यांचे आजपासून महाळुंग-श्रीपुर नगरपंचायत कार्यालयासमोर आमरण उपोषण
महाळुंग (बारामती झटका)
महाळुंग श्रीपुर येथील रहिवासी रणजीत लक्ष्मण नवगिरे यांचे महाळुंग श्रीपुर नगरपंचायत प्रशासनातील भ्रष्टाचार, अधिकाराचा गैरवापर आणि निकृष्ट कामाच्या निषेधार्थ आमरण उपोषण आज मंगळवार दि. १७/०२/२०२६ रोजी सकाळी १० वाजल्यापासून महाळुंग-श्रीपुर नगरपंचायत कार्यालयासमोर आमरण उपोषण सुरू झाले आहे. नगरपंचायत मुख्याधिकारी यांना दि. २३/०१/२०२६ रोजी तक्रारी अर्जही दिला होता. त्यानंतर बोगस तपासणी विरोधात सोमवार दि. ०२/०२/२०२६ रोजी निवेदन ही देण्यात आले होते. त्याच पार्श्वभूमीवर रणजीत नवगिरे यांचे आमरण उपोषण सुरू झाले आहे.
सदर निवेदनामध्ये असे नमूद करण्यात आले आहे की, मी रणजित लक्ष्मण नवगिरे, महाळुंग-श्रीपूर नगरपंचायतीचा रहिवासी असून, या निवेदनाद्वारे आपणास सूचित करतो की, आमच्या नगरपंचायत हद्दीत सध्या सुरू असलेली विकासकामे ही भ्रष्टाचाराचे केंद्र बनली आहेत. तक्रार करूनही प्रशासन जाणीवपूर्वक दुर्लक्ष करत असल्याने, मी येणाऱ्या दिनांकः १७/०२/२०२६ मंगळवारी सकाळी १०:०० वाजल्यापासून महाळुंग श्रीपूर नगरपंचायत कार्यालय समोर येथे ‘आमरण उपोषणास’ बसत आहे.
प्रशासकीय गैरप्रकाराचे पुरावे खालील प्रमाणे आहेत –
१) अधिकाराचा गैरवापर व निधीचा अपव्यय : अण्णाभाऊ साठे नगर, प्रभाग क्रमांक ५ येथे नगराध्यक्षांचे निवासस्थान आहे. या ठिकाणी रस्त्याचे काम करताना मंजूर अंदाजपत्रकातील (Estimate) निकष धाब्यावर बसवून, ठरवून दिलेल्या रुंदीपेक्षा जास्त रुंदीचा रस्ता केवळ नगराध्यक्षांच्या आणि नातेवाईकांच्या सोयीसाठी नियमबाह्य पद्धतीने तयार करण्यात आला आहे. हा सार्वजनिक निधीचा वैयक्तिक फायद्यासाठी केलेला अपहार आहे.
२) बोगस तपासणीचा बना वः निकृष्ट कामाबाबत तक्रार केल्यावर, त्याची तांत्रिक तपासणी करण्याऐवजी अधिकाऱ्यांनी शासकीय सुट्टीच्या दिवशी (रविवारी) कंत्राटदाराशी संगनमत करून ‘बोगस तपासणी’चा फार्स उरकला आहे. ही तपासणी पूर्णपणे बेकायदेशीर असून आम्हाला अमान्य आहे.
३. माहिती फलक व पारदर्शकतेचा अभा वः कामाच्या ठिकाणी माहिती फलक न लावणे आणि ९ दिवस उलटूनही तक्रारीची दखल न घेणे, यावरून भ्रष्टाचार दडपण्याचा प्रयत्न सुरू असल्याचे स्पष्ट होत आहे.
माझ्या प्रमुख मागण्या :
प्रभाग क्रमांक ५ मधील वाढीव रुंदीच्या रस्त्याचे मोजमाप करून, त्या वाढीव कामाचा खर्च नगराध्यक्ष आणि कंत्राटदार यांच्याकडून वैयक्तिकरित्या वसूल करण्यात यावा.
महाळुंग-श्रीपूर नगरपंचायत हद्दीत १ ते १७ वार्डात चालू असणाऱ्या व पूर्ण झालेल्या गटार व कॉक्रेट रस्ते च्या कामाची बिले रोखण्यात यावी व कामाला स्थगिती द्यावी.
दि. २३/०१/२०२६ रोजी दिलेल्या निवेदनाप्रमाणे ऐकले नाही आणि जर बिल अदा केले गेले, तर त्यास जबाबदार असलेल्या अधिकाऱ्याकडून ती रक्कम वसूल करण्यात यावी.
PWD च्या गुणवत्ता नियंत्रण विभागामार्फत कामाचे ‘कोर कटिंग’ करून तांत्रिक चौकशी व्हावी.
बोगस तपासणी करणाऱ्या दोषी अधिकाऱ्यांवर निलंबनाची कारवाई व्हावी.
परवाना रद्द करणे : संबंधित निकृष्ट काम करणाऱ्या कंत्राटदाराला तातडीने ‘काळ्या यादीत’ (Blacklist) टाकण्यात यावे.
वरील मागण्यांसाठी मी महाळुंग-श्रीपूर नगरपंचायत कार्यालय समोर दि. १७/०२/२०२६ मंगळावर रोजी सकाळी १० वाजता आमरण उपोषण करण्यास मी बसत आहे. जोपर्यंत वरील मागण्या नुसार संबंधित अधिकारी आणि कंत्राटदार यांच्यावर कारवाई होत नाही आणि मागण्या लेखीस्वरूपात मान्य होत नाहीत तोपर्यंत मी माझे उपोषण सोडणार नाही. माझ्या प्रकृतीस काही अपाय झाल्यास त्याची संपूर्ण जबाबदारी महाळुंग-श्रीपूर नगरपंचायत प्रशासन, नगराध्यक्ष आणि संबंधित कंत्राटदार यांची राहील. असे या निवेदनात नमूद करण्यात आले आहे. सदर निवेदनाच्या प्रती मा. जिल्हाधिकारी, सोलापूर, मा. पोलीस निरीक्षक, अकलूज/महाळुंग-श्रीपूर पोलीस स्टेशन, मा. मुख्याधिकारी, महाळुंग-श्रीपूर नगरपंचायत यांना देण्यात आल्या आहेत.
नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.
