“सद्गुरु श्री श्री कारखान्यात बॉयलर अग्निप्रदीपन व गळीत हंगाम शुभारंभ श्री सत्यनारायणाच्या महापूजेने व गणरायाच्या साक्षीने भक्तीमय वातावरणात संपन्न”

पिलीव (बारामती झटका) रघुनाथ देवकर यांजकडून

सांगली, सातारा, सोलापूर जिल्ह्यांच्या सरहद्दीवर सद्गुरु श्री श्री रविशंकरजी यांच्या पदस्पर्शाने पावन झालेल्या सद्गुरु श्री श्री सा. का. स्थळावर व्हाईस चेअरमन श्री. व सौ. शोभा बाळासाहेब कर्णवर पाटील यांचे हस्ते वजन काट्यावर सत्यनारायण महापूजा, तर सुदर्शन होमपूजा कारखान्याचे चेअरमन एन. शेषगिरीरावसर यांच्या हस्ते श्रीयुत कापरे गुरुजी (पुणे) यांनी मंत्रोच्चार करून विधिवत पूर्ण झाल्यानंतर कारखान्याचा बॉयलर अग्निप्रदीपन कार्यस्थळावर चेअरमन एन. शेषगिरीराव, व्हाईस चेअरमन बाळासाहेब कर्णवर पाटील, संचालक श्रावण (दादा) वाकसे, मोहन आप्पा बागल, वेदांत जाधव, जनरल मॅनेजर सत्यनारायण रेड्डी व सर्व खातेप्रमुख यांच्या हस्ते संपन्न झाला.

त्यानंतर वजन काट्यावर विधिवत उसाने भरून आलेल्या वाहनाची पूजा ह. भ. प. बापूसाहेब महाराज देहूकर, मळवली यांच्या शुभहस्ते करण्यात आली. बैलगाडीची पूजा करून मोळी पूजनानंतर गव्हाण पूजन केले व गव्हाणीत मोळी टाकण्याचा कार्यक्रम उपस्थित मान्यवरांच्या समवेत झाला.

त्यानंतर एच. आर. अँड ॲडमिन मॅनेजर सचिन खटके यांच्या टीमने व्यासपीठाची व्यवस्था चोखपणे ठेवून, मान्यवरांच्या शुभहस्ते सद्गुरु श्री श्री रविशंकरजी यांच्या प्रतिमेचे पूजन करून दीपप्रज्वलनाने सभेच्या कार्यक्रमाला सुरुवात झाली. प्रस्ताविक केन मॅनेजर सुनील सावंत यांनी केले. यावेळी त्यांनी आपल्या प्रास्ताविकातून चालू गळीत हंगामासाठी (२०२६-२७) सर्व यंत्रणा सज्ज असून ६०० ट्रॅक्टर, १० हार्वेस्टर मशीनचे करार झाले असून एकूण १२,०९० हेक्टर नोंदीचे क्षेत्र असल्याचे सांगितले.

तर चेअरमन एन. शेषगिरीराव, व्हाईस चेअरमन बाळासाहेब कर्णवर पाटील, श्रावण दादा वाकसे यांनी आपल्या मार्गदर्शनपर भाषणातून सर्व सभासदांना आवाहन केले की, गेली १४ वर्षे आम्हाला ज्याप्रमाणे आपण सहकार्य केले, तेच सहकार्य भविष्यात द्यावे. आपला कारखाना संचालक मंडळ नेहमीच ‘शेतकऱ्यांचे हित हेच आमचे हित’ हे धोरण ठेवून काम करीत आला आहे व करणार आहे. शेतकरी संघटनेचे कांतीलाल नाईकनवरे, राजेवाडीचे सरपंच प्रशांत शिरकांडे, चांदापुरीचे माजी सरपंच भजनदास चोरमले यांनी आपले विचार मांडले. तर ह. भ. प. बापूसाहेब देहूकर महाराज तसेच यांनी आपले मौलिक विचार मांडून कारखान्याची प्रशंसा करत भवितव्यासाठी शुभ आशीर्वाद दिले.

यावेळी हिंगणीच्या सरपंच संगीताताई सरतापे, संग्राम दुपडे, शाम तात्या मदने, ज्योतीराम अवताडे, चांदापुरीचे माजी सरपंच भजनदास चोरमले, नईम खान पठाण व गावोगावचे सरपंच, उपसरपंच, चेअरमन, व्हाईस चेअरमन, सर्व खातेप्रमुख, सर्व कर्मचारी, कामगार तसेच असंख्य ऊस उत्पादक सभासद शेतकरी बांधव उपस्थित होते. यावेळी सूत्रसंचालन रघुनाथ देवकर यांनी केले, तर आभार शेती अधिकारी दत्ता क्षीरसागर यांनी मानले.

नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.