ब्लॅकमेल व मानसिक छळातून तरुणाची आत्महत्या;

खडकवासला येथील तिघांविरुद्ध गुन्हा, आरोपी तरुणीचे वडील एपीआय, अटकेबाबत चर्चेला उधाण

बारामती (बारामती झटका)

बारामती तालुक्यातील मौजे रुई बयाजीनगर येथे घडलेल्या धक्कादायक घटनेत 23 वर्षीय तरुणाने मानसिक त्रासाला कंटाळून आत्महत्या केल्याची घटना समोर आली आहे. या प्रकरणी बारामती ग्रामीण पोलीस ठाण्यात खडकवासला (पुणे) येथील तिघांविरुद्ध भारतीय न्याय संहिता, 2023 अंतर्गत गंभीर स्वरूपाचा गुन्हा दाखल करण्यात आला असून, आरोपींपैकी एक आरोपी तरुणीचे वडील हे पुणे शहरात पोलीस उपनिरीक्षक (PSI) पदावर कार्यरत असल्याने या प्रकरणाला विशेष महत्त्व प्राप्त झाले आहे.

मयत विक्रम उर्फ बबलु नवनाथ कोळपे (वय 23, रा. बयाजीनगर, रुई, ता. बारामती, जि. पुणे) याने दि. 15 फेब्रुवारी 2026 रोजी सायंकाळी 7 ते 7.45 या वेळेत आपल्या राहत्या घरातील किचनरूममध्ये स्लॅबला असलेल्या लोखंडी हुकाला साडीने गळफास घेऊन आत्महत्या केली. घटनेनंतर त्याला तातडीने रुई ग्रामीण रुग्णालयात दाखल करण्यात आले; मात्र डॉक्टरांनी तपासणीअंती त्याला मृत घोषित केले.

घटनास्थळी मिळालेल्या सुसाईड नोटमध्ये विक्रमने एका तरुणीमुळे गेल्या पाच वर्षांपासून मानसिक छळ, धमक्या व ब्लॅकमेलिंगला सामोरे जावे लागत असल्याचा उल्लेख केला आहे. लग्नाचे खोटे आश्वासन देऊन आपला भावनिक व आर्थिक वापर करण्यात आला, तसेच फोटो व चॅटिंगच्या आधारे धमकावण्यात आल्याचेही त्याने नमूद केले आहे.

मयताच्या नातेवाईकांनी पोलिसांना दिलेल्या जबाबानुसार, संबंधित तरुणी, तिची बहीण व वडील यांनी विक्रमला पुण्यात बोलावून त्याच्या मोबाईलमधील फोटो व चॅट्स जबरदस्तीने डिलीट केले. तसेच त्याला गंभीर परिणामांची धमकी दिली होती. विशेष बाब म्हणजे, आरोपी तरुणीचे वडील हे पुणे येथे एपीआय म्हणून कार्यरत असून, त्यांनीही फोनवरून दमदाटी व धमकी दिल्याचा आरोप फिर्यादीत करण्यात आला आहे. या बाबींची प्रथमदर्शनी माहिती तपासात समोर येत आहे.

या संपूर्ण प्रकरणात बारामती ग्रामीण पोलीस ठाण्यात सृष्टी विकास मते, श्रृती विकास मते व विकास मते (सर्व रा. खडकवासला, पुणे) यांच्याविरुद्ध भारतीय न्याय संहिता 2023 अंतर्गत कलम 108, 351(2), 351(3), 352 व 3(5) अन्वये गुन्हा दाखल करण्यात आला आहे. आरोपी तरुणीचे वडील हे पोलीस अधिकारी असल्याने त्यांना अटक होणार का, की कायदेशीर प्रक्रियेनुसार पुढील कारवाई काय असेल, याकडे सर्वांचे लक्ष लागले आहे.

सदर प्रकरणाचा तपास वरिष्ठ अधिकाऱ्यांच्या मार्गदर्शनाखाली सुरू असून, सुसाईड नोट, मोबाईल डेटा, कॉल रेकॉर्ड्स व सीसीटीव्ही फुटेजच्या आधारे पुढील कायदेशीर कारवाई करण्यात येणार असल्याची माहिती पोलीस सूत्रांनी दिली आहे.

नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.