ईद-ए-मिलादुन्नबी निमित्त आयोजित रक्तदान शिबिरास उत्स्फूर्त प्रतिसाद

१०२ रक्तदात्यांनी रक्तदान करून जपली सामाजिक बांधिलकी

अकलूज (बारामती झटका)

ईद-ए-मिलादुन्नबीच्या पवित्र सणानिमित्त सहायता वेलफेअर फाउंडेशन आणि मदनी फाउंडेशन, अकलूज यांच्या संयुक्त विद्यमाने आयोजित करण्यात आलेल्या भव्य रक्तदान शिबिरास नागरिकांचा उत्स्फूर्त प्रतिसाद मिळाला. या शिबिरात तब्बल १०२ रक्तदात्यांनी रक्तदान करून सामाजिक बांधिलकी जपली.

‘रक्तदान हेच श्रेष्ठ दान’ या मानवतावादी भावनेतून आयोजित करण्यात आलेल्या या शिबिरात विविध समाजातील युवक, नागरिक, सामाजिक कार्यकर्ते आणि रक्तदात्यांनी मोठ्या संख्येने सहभाग नोंदविला. आपल्या रक्तदानामुळे गरजू रुग्णाला जीवनदान मिळू शकते, या भावनेतून रक्तदात्यांनी उत्स्फूर्तपणे पुढाकार घेतला.

ईद-ए-मिलादुन्नबीच्या धार्मिक व पवित्र पर्वाला मानवसेवेची जोड देत आयोजित करण्यात आलेल्या या उपक्रमातून सामाजिक एकोपा, बंधुभाव आणि मानवतेचा सुंदर संदेश देण्यात आला. रक्तदात्यांच्या उत्स्फूर्त सहभागामुळे शिबिराला विशेष यश प्राप्त झाले.

या शिबिरात रक्तदान करणाऱ्या सर्व १०२ रक्तदात्यांचे आयोजकांच्या वतीने मनःपूर्वक आभार मानण्यात आले. तसेच शिबिराच्या यशस्वी आयोजनासाठी परिश्रम घेणारे वैद्यकीय पथक, स्वयंसेवक, सामाजिक कार्यकर्ते आणि सहकार्य करणाऱ्या सर्व नागरिकांचे विशेष कौतुक करण्यात आले.

यावेळी “रक्तदान करा, जीवनदान द्या” हा संदेश देत समाजातील अधिकाधिक नागरिकांनी नियमित रक्तदानासाठी पुढे यावे आणि मानवसेवेच्या या कार्यात आपले योगदान द्यावे, असे आवाहन आयोजकांच्या वतीने करण्यात आले.

— सहायता वेलफेअर फाउंडेशन व मदनी फाउंडेशन, अकलूज

नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.