रणजीतसिंह मोहिते पाटील यांची ‘कटी पतंग’ सारखी राजकीय अवस्था! भाजपचा धागा तुटला, बदलत्या परिस्थितीत नवे नेतृत्व शोधावे लागणार
विधान परिषद आमदारकीनंतर रणजीतसिंह मोहिते पाटील यांच्या राजकीय स्थितीत बदल. भाजपशी धागा तुटल्याच्या चर्चा, लोकसभा-विधानसभेतील भूमिकेवर प्रश्नचिन्ह. महायुतीच्या युगात नव्या पक्षाचा पर्याय शोधण्याची वेळ.
माजी विधान परिषद आमदार रणजीतसिंह मोहिते पाटील. सध्याची राजकीय अवस्था ‘कटी पतंग’ सारखी असल्याची चर्चा.
अकलूज (बारामती झटका)
एकेकाळी सोलापूर जिल्ह्याच्या राजकारणात भरारी घेणारी रणजीतसिंह मोहिते पाटील यांची राजकीय पतंग सध्या ‘कटी पतंग’ सारखी झाल्याची चर्चा राजकीय वर्तुळात आहे. विधान परिषद आमदारकीचा 6 वर्षांचा कार्यकाळ संपल्यानंतर आणि भारतीय जनता पार्टीचा धागा तुटल्यानंतर त्यांच्यासमोर नवे राजकीय समीकरण शोधण्याचे आव्हान उभे राहिले आहे.
भाजपने रणजीतसिंह मोहिते पाटील यांना विधान परिषदेची आमदारकी दिली. राष्ट्रवादी काँग्रेसमध्ये राजकीय कोंडी झाल्यानंतर ‘शिवरत्न’वरील मोहिते पाटील यांनी भाजपमध्ये प्रवेश केला होता.
आमदारकीच्या कार्यकाळात त्यांना श्री शंकर सहकारी साखर कारखाना लिमिटेड पुरंदावडे सदाशिवनगरसाठी 113 कोटी रुपयांचे आर्थिक सहकार्य मिळाले होते. परंतु विधान परिषदेचा कार्यकाळ संपल्यानंतर आणि अलीकडील जिल्हा परिषद निवडणुकीत भाजपच्या अधिकृत उमेदवाराच्या प्रचारात सक्रिय न दिसल्याने ‘भाजपचा धागा तुटला’ अशा चर्चा आहेत.
राजकीय वर्तुळात अशी चर्चा आहे की, लोकसभा निवडणुकीत भाजपचे उमेदवार रणजितसिंह नाईक निंबाळकर आणि विधानसभा निवडणुकीत भाजपचे उमेदवार रामभाऊ सातपुते यांना उमेदवारी मिळाल्यानंतरही रणजीतसिंह मोहिते पाटील हे भाजपच्या व्यासपीठावर फारसे दिसले नाहीत.
भाजपच्या काही निष्ठावान कार्यकर्त्यांचा आरोप आहे की, त्यावेळी त्यांचे कार्यकर्ते विरोधी उमेदवारांच्या बाजूने सक्रिय होते. भाजपचे आमदार असताना विरोधी भूमिका घेतल्यामुळे पक्षाच्या वरिष्ठ नेतृत्वाने त्याची दखल घेतली आणि विधान परिषदेसाठी पुनश्च संधी दिली नाही, अशी माहिती सूत्रांनी दिली.
सोलापूर जिल्हा स्थानिक स्वराज्य संस्था विधान परिषद निवडणुकीत महायुतीचे अधिकृत उमेदवार बार्शीचे माजी आमदार राजेंद्र उर्फ राजाभाऊ राऊत यांच्या प्रचारार्थ रणजीतसिंह मोहिते पाटील हे कोठेही दिसले नाहीत.
यामुळे राजकीय निरीक्षक म्हणतात की, “एकेकाळी उंच उडणारी पतंग आता दोरी तुटल्यामुळे जमिनीवर आली आहे. भाजपचा धागा तुटल्यानंतर त्यांना बदलत्या राजकीय परिस्थितीत नव्याने नेतृत्व आणि व्यासपीठ शोधावे लागणार आहे.”
सध्या महाराष्ट्रात भाजप, राष्ट्रवादी काँग्रेस अजित पवार गट आणि शिवसेना शिंदे गट यांचे महायुतीचे सरकार आहे. रणजीतसिंह मोहिते पाटील हे राष्ट्रवादी काँग्रेसमध्ये कोंडी झाल्यामुळे भाजपमध्ये गेले होते.
आता भाजपचा धागा तुटल्याने ते पुन्हा राष्ट्रवादी काँग्रेस अजित पवार गटाकडे जातील की शिवसेना शिंदे गटाकडे आकर्षित होतील, याकडे सर्वांचे लक्ष आहे. माळशिरस-तालुक्यातील मोहिते पाटील घराण्याचा पारंपरिक मतदारवर्ग लक्षात घेता, महायुतीतील एखाद्या पक्षाकडे ते नवे राजकीय घर शोधतील, अशी शक्यता वर्तवली जात आहे.
“राजकारणात निष्ठा आणि सातत्य महत्त्वाचे असते. भाजपने मोठी संधी दिली, आमदारकी दिली, कारखान्याला निधी मिळाला. परंतु नंतरच्या निवडणुकांमधील भूमिकेमुळे पक्षश्रेष्ठींचा विश्वास उडाला. आता महायुतीचे सरकार आहे, त्यामुळे त्यांना राष्ट्रवादी किंवा शिवसेनेपैकी एका घटक पक्षाकडे जावे लागेल. नाहीतर स्वतंत्र लढण्याशिवाय पर्याय राहणार नाही” – सोलापूरचे ज्येष्ठ राजकीय विश्लेषक.
रणजीतसिंह मोहिते पाटील यांची राजकीय कारकीर्द म्हणजे चढ-उतारांचा प्रवास आहे. राष्ट्रवादीतून भाजपमध्ये प्रवेश, विधान परिषद आमदारकी, कारखान्याला निधी, सर्व काही अलबेल होते. परंतु बदलत्या राजकीय परिस्थितीत भूमिकेमुळे भाजपचा धागा तुटला. आता ‘कटी पतंग’ झालेल्या या राजकीय कारकीर्दीला नवे बळ देण्यासाठी त्यांना महायुतीतील एखाद्या पक्षाकडे नवे नेतृत्व शोधावे लागणार आहे. पतंग पुन्हा उडणार का, हे येणारा काळ ठरवेल.
नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.
