मा. खासदार रणजितसिंह नाईक निंबाळकर, आ. सचिन पाटील, नगराध्यक्ष समशेरसिंह नाईक निंबाळकर यांचा स्तुत्य उपक्रम ..

कर्मचाऱ्यांच्या चेहऱ्यावर हास्य फुलविणारी फलटणची दिवाळी! सर्व कर्मचाऱ्यांना स्नेहभेट, महिला कर्मचाऱ्यांना साडी देऊन कृतज्ञतेचा सन्मान

फलटण (बारामती झटका)

दिवाळी म्हणजे केवळ दिव्यांची रोषणाई, फराळ, फटाके आणि नवीन कपड्यांचा आनंद नव्हे, तर माणसामाणसांमधील आपुलकी, प्रेम, जिव्हाळा आणि कृतज्ञतेची भावना अधिक दृढ करणारा सण! प्रत्येकाच्या घरात आनंदाचा दिवा उजळावा, प्रत्येकाच्या चेहऱ्यावर समाधानाचे हास्य फुलावे आणि आपल्या सोबत काम करणाऱ्या माणसांनाही सणाचा आनंद अनुभवता यावा, हीच दिवाळीची खरी भावना आहे. याच भावनेला कृतीतून साकार करत मा. खासदार रणजितसिंह नाईक निंबाळकर, आमदार सचिन पाटील, नगराध्यक्ष समशेरसिंह नाईक निंबाळकर यांच्यावतीने स्वखर्चातून फलटण नगरपरिषदेतील सर्व कर्मचाऱ्यांना दिवाळीचा फराळ भेट म्हणून देण्यात आला, तर सर्व महिला कर्मचाऱ्यांना फराळ व साडी भेट देऊन त्यांचा सन्मान करण्यात आला. या उपक्रमामुळे कर्मचाऱ्यांच्या चेहऱ्यावर आनंद फुलला असून, दिवाळीच्या निमित्ताने आपुलकीचे आणि माणुसकीचे नाते जपण्याचा सुंदर संदेश देण्यात आला. मा. खासदार रणजितसिंह नाईक निंबाळकर, आमदार सचिन पाटील, नगराध्यक्ष समशेरसिंह नाईक निंबाळकर यांच्या सहकार्याने व स्वखर्चाने हा उपक्रम राबविण्यात आला. यावेळी मनिषा समशेरसिंह नाईक निंबाळकर व जिजामाला रणजितसिंह नाईक निंबाळकर यांच्या हस्ते दिवाळी भेट देण्यात आली.

शहराच्या विकासामागील हातांचा सन्मान!

शहर सुंदर दिसते, रस्ते स्वच्छ राहतात, नागरिकांना पाणीपुरवठा होतो, सार्वजनिक ठिकाणी स्वच्छता राखली जाते, पथदिव्यांमुळे रात्रीचे रस्ते प्रकाशमान होतात; मात्र या प्रत्येक सुविधेमागे अहोरात्र मेहनत घेणाऱ्या अनेक कर्मचाऱ्यांचे कष्ट असतात. शहरातील नागरिकांना चांगल्या सुविधा मिळाव्यात यासाठी नगरपरिषदेचे कर्मचारी ऊन, वारा, पाऊस यांची तमा न बाळगता आपली जबाबदारी पार पाडत असतात. अनेकदा नागरिकांच्या सोयीसाठी त्यांना सण-उत्सवांच्या दिवशीही कर्तव्य बजावावे लागते. त्यांच्या या योगदानामुळेच शहराच्या दैनंदिन व्यवस्थेचे चक्र सुरळीत सुरू राहते. मात्र या कामाच्या व्यापात अनेकदा त्यांच्या कष्टांची आणि योगदानाची पुरेशी दखल घेतली जात नाही. अशा परिस्थितीत दिवाळीसारख्या आनंदाच्या सणाला त्यांच्या कामाची आठवण ठेवून त्यांना स्नेहभेट देणे, ही केवळ औपचारिकता नसून त्यांच्या श्रमांप्रती व्यक्त केलेली कृतज्ञता आहे अशी भावना मनिषा समशेरसिंह नाईक निंबाळकर यांनी वक्त केली

महिला कर्मचाऱ्यांच्या सन्मानातून जपली आपुलकीची भावना!

नगरपरिषदेमध्ये विविध विभागांत जबाबदारी पार पाडणाऱ्या महिला कर्मचाऱ्यांनाही या उपक्रमात विशेष सन्मान देण्यात आला. सर्व महिला कर्मचाऱ्यांना साडी व फराळ भेट देऊन त्यांच्या कार्याचा आणि योगदानाचा गौरव करण्यात आला. घरातील जबाबदाऱ्या सांभाळत कार्यालयीन कामकाजातही तितक्याच निष्ठेने योगदान देणाऱ्या महिलांच्या कष्टांचा सन्मान करण्याची ही भावना निश्चितच महत्त्वपूर्ण आहे.

साडी ही केवळ भेटवस्तू नसून सणाच्या निमित्ताने व्यक्त केलेला स्नेह, आदर आणि आपुलकीचे प्रतीक ठरली. आपल्या कामाची दखल घेतली जाते, आपल्यालाही कुटुंबाचा एक भाग मानले जाते, ही भावना कर्मचाऱ्यांसाठी निश्चितच आनंददायी असते अशी भावना जिजामाला रणजितसिंह नाईक निंबाळकर यांनी व्यक्त केली.

भेटवस्तूंपेक्षा माणुसकीचा भाव महत्त्वाचा!

दिवाळीच्या काळात अनेक ठिकाणी मोठ्या प्रमाणावर रोषणाई आणि उत्सव साजरे केले जातात. मात्र आपल्या सोबत काम करणाऱ्या कर्मचाऱ्यांच्या आनंदात सहभागी होणे, त्यांच्या चेहऱ्यावर समाधान फुलविणे आणि त्यांच्या योगदानाची आठवण ठेवणे, यालाही तितकेच महत्त्व आहे. मा. खासदार रणजितसिंह नाईक निंबाळकर, आमदार सचिन पाटील, नगराध्यक्ष समशेरसिंह नाईक निंबाळकर यांच्या उपक्रमातून हाच सकारात्मक संदेश समोर आला आहे.

कर्मचारी कोणत्याही संस्थेचा कणा असतात. पद कोणतेही असो, कामाचे स्वरूप कोणतेही असो, प्रत्येक व्यक्तीच्या योगदानातूनच संस्थेची ओळख निर्माण होत असते. त्यामुळे कर्मचाऱ्यांना सन्मानाची वागणूक, आपुलकीची भावना आणि त्यांच्या कामाची योग्य दखल मिळणे गरजेचे आहे. दिवाळीच्या निमित्ताने देण्यात आलेल्या या भेटींमुळे कर्मचाऱ्यांमध्ये आनंदासोबतच आपलेपणाची भावना अधिक दृढ होण्यास मदत होणार आहे.

दिवाळीचा खरा प्रकाश दिव्यांमध्ये नसतो, तर माणसांच्या चेहऱ्यावर फुलणाऱ्या आनंदात असतो. आपल्या सोबत काम करणाऱ्या हातांचा सन्मान करणे, त्यांच्या कष्टांची जाणीव ठेवणे आणि त्यांच्या आनंदात सहभागी होणे, हीच खऱ्या अर्थाने दिवाळीची संस्कृती आहे. मा. खासदार रणजितसिंह नाईक निंबाळकर, आमदार सचिन पाटील, नगराध्यक्ष समशेरसिंह नाईक निंबाळकर यांच्या या स्नेहपूर्ण उपक्रमातून भेटवस्तूंच्या पलीकडे जाऊन माणुसकी, कृतज्ञता आणि आपुलकीचा दिवा प्रज्वलित करण्यात आला.

नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.