ऊस पिकावरील किडीच्या प्रादुर्भावाच्या पार्श्वभूमीवर कृषी विभागाकडून पाहणी व मार्गदर्शन

बारामती (बारामती झटका)

ऊस पिकावर किडीचा प्रादुर्भाव आढळून येत असल्याच्या पार्श्वभूमीवर बारामती तालुका कृषी विभागामार्फत विविध उपाययोजना व जनजागृती करण्यात येत आहे. ऊस व इतर पिकांमध्ये कीड व रोगांचा प्रादुर्भाव आढळून आल्याने शेतकऱ्यांना वेळेत उपाययोजना करण्याचे आवाहन तालुका कृषी अधिकारी सचिन हाके यांनी केले आहे.

तालुका कृषी अधिकारी कार्यालयाच्या माध्यमातून माळेगाव सहकारी साखर कारखाना परिसरातील क्षेत्रीय पिकांची पाहणी करण्यात आली. यावेळी कृषी विज्ञान केंद्र, बारामती येथील शास्त्रज्ञ दत्तात्रय पवार, तालुका कृषी अधिकारी तसेच मंडळ कृषी अधिकारी व कृषी विभागातील अधिकारी-कर्मचारी उपस्थित होते. पाहणीदरम्यान ऊस पिकातील किडीचा प्रादुर्भाव लक्षात घेऊन आवश्यक त्या उपाययोजनांबाबत शेतकऱ्यांना मार्गदर्शन करण्यात आले.

किड नियंत्रणासाठी किडीच्या प्रादुर्भावाची तीव्रता लक्षात घेऊन आवश्यकतेनुसार रासायनिक तसेच जैविक उपाययोजना करण्याच्या सूचना देण्यात आल्या.

किडीचा प्रादुर्भाव कमी करण्यासाठी बाधित पाने व मावा काढून नष्ट करणे, शेताची नियमित पाहणी करणे आणि प्रादुर्भावाची लक्षणे आढळताच तत्काळ नियंत्रणाच्या उपाययोजना करणे आवश्यक असल्याचे कृषी विभागाने स्पष्ट केले.

शेतामध्ये ऊस पिकावर किंवा इतर पिकांवर कोणत्याही प्रकारची कीड अथवा रोग आढळल्यास जवळच्या कृषी सहाय्यक, कृषी अधिकारी किंवा उपकृषी अधिकारी यांच्याशी संपर्क साधावा. वेळेवर निदान व योग्य व्यवस्थापन केल्यास किडीचा प्रादुर्भाव नियंत्रित करण्यास मदत होईल, असेही श्री.हाके यांनी कळविले आहे.

नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.