उंबरे दहिगाव पंचक्रोशीतील गोरगरीब व सर्वसामान्य जनतेची अनाथांची आई कृष्णामाई यांनी अखेरचा श्वास घेतला..

श्रीनिवास कदम पाटील November 17, 2023

भाजपचे सोलापूर जिल्हा उपाध्यक्ष सोपानकाका नारनवर यांच्या आजी श्रीमती कृष्णामाई पंढरीनाथ नारनवर यांचे वयाच्या 119 व्या वर्षी वार्धक्याने दुःखद निधन.

माळशिरस (बारामती झटका)

उंबरे दहिगाव ता. माळशिरस, येथील सर्वसामान्य जनतेची अनाथांची आई, सर्वांची तारणहार, अन्नदाता असणाऱ्या, गोरगरीब जनतेवर मनापासून प्रेम व माया करणाऱ्या श्रीमती कृष्णामाई पंढरीनाथ नारनवर यांनी आज शुक्रवार दि. 17/11/23 रोजी सकाळी 11:30 वाजता वृद्धपकाळाने राहत्या निवासस्थानी 119 व्या वर्षी अखेरचा श्वास घेतलेला आहे. त्यांच्या पश्चात 6 मुले, 7 सुना, 35 परतोंडे, 19 नातवंडे असा मोठा परिवार आहे. माळशिरस पंचायत समितीच्या माजी सदस्य सौ. छायाताई सोपानराव नारनवर यांच्या आजेसासू तर भारतीय जनता पक्षाचे सोलापूर जिल्हा उपाध्यक्ष सोपानकाका नारनवर यांच्या आजी होत्या.

कृष्णामाई प्रतिकूल परिस्थितीत घरांमध्ये आलेल्या कोणालाच मायेचा आधार व प्रेमाचे दोन घास भरविल्याशिवाय, रिकाम्या हाताने पाठवत नव्हत्या. सर्वसामान्य जनतेची अनाथांची आई असणाऱ्या कृष्णामाई, सढळ हाताने मदत व प्रेमाने बोलणे यामुळे परिसरात सुपरीचीत होत्या. भाजपचे सोलापूर जिल्हा उपाध्यक्ष सोपानकाका नारनवर यांच्या राजकीय जडणघडणीत कृष्णामाई यांचा सिंहाचा वाटा होता.

सोपानकाका यांना उंबरे दहिगाव गावचे सरपंच पद व इतर पदावर काम करीत असताना मोलाचे मार्गदर्शन मिळालेले होते. सौ. छायादेवी सोपानराव नारनवर यांनी माळशिरस पंचायत समितीवर सदस्य म्हणून निवडून आल्यानंतर कृष्णामाई यांनी भरभरून अभिनंदन केलेले होते. सध्या त्यांच्या घरातील नातवंडे व परतवंडे विविध क्षेत्रात काम करीत आहेत. कृष्णामाई यांचे डोळे, कान, सर्व अवयव शेवटपर्यंत चांगले होते. त्यांचा सुसंस्कृत स्वभाव होता. त्यांना भेटण्याकरता अनेक राजकीय, सामाजिक, सांस्कृतिक, कला, क्रीडा, कृषी क्षेत्रातील नातेवाईक व मित्रपरिवार यांनी वेळोवेळी भेटी दिलेल्या आहेत. कृष्णामाई यांच्या जाण्याने उंबरे दहिगाव येथील सर्वसामान्य जनतेचा व गोरगरिबांचा आधारवड कोसळला आहे. नारनवर परिवार यांना दुःखातून सावरण्याचे ईश्वर बळ देवो व कृष्णामाई यांच्या आत्म्यास शांती लाभो, हीच बारामती झटका परिवार यांच्यावतीने भावपूर्ण आदरांजली…