डॉक्टर आप्पासाहेब टेळे यांनी माळशिरसच्या शिरपेचात मानाचा तुरा रोवला

श्रीनिवास कदम पाटील October 18, 2023

माळशिरस (बारामती झटका)

माळशिरस शहरातील सुप्रसिद्ध नेत्रतज्ञ डॉ. आप्पासाहेब भिवाजी टेळे यांनी सिलेक्शन ऑफ आयडियल इंटर लेन्स या विषयावर पेपर प्रेझेंटेशन केल्यामुळे प्रथम क्रमांक मिळवून घवघवीत यश संपादन करून माळशिरस तालुक्याच्या शिरपेचात मानाचा तुरा रोवला आहे. याबद्दल त्यांचा सत्कार करण्यात आला. यावेळी माळशिरस नगर पंचायतीचे नगराध्यक्ष डॉ. आप्पासाहेब देशमुख, महाराष्ट्र नवनिर्माण सेनेचे माळशिरस तालुकाध्यक्ष सुरेश टेळे, मुख्याधिकारी नितीन गाढवे आदी उपस्थित होते. त्यामुळे माळशिरस शहर व तालुक्यातील कानाकोपऱ्यातून डॉ. आप्पासाहेब टेळे यांच्यावर शुभेच्छांचा वर्षाव होत आहे.

गोवा येथे ६ वी आंतरराष्ट्रीय व १८ वी राष्ट्रीय परिषद सिनर्जी २०२३ टास द असोसिएशन ऑफ शलाका महाराष्ट्र यांच्यावतीने ही परिषद आयोजित करण्यात आली होती. या परिषदेमध्ये डॉ. आप्पा भिवाजी टेळे यांना प्रथम क्रमांकाने सन्मानित करण्यात आले. हा सन्मान गोव्याचे मुख्यमंत्री यांच्या हस्ते संपन्न झाला. ही परिषद दि. ६, ७, ८ ऑक्टोबर २०२३ रोजी पार पडली. या परिषदेला देश विदेशातून डॉक्टरांनी मोठ्या संख्येने हजेरी लावली होती.