माळशिरस (बारामती झटका)
प्रत्येकाच्या घरात बाळ जन्माला येणं खूप आनंदाची गोष्ट असते. पूर्वीच्या काळी लोक फक्त मुलगा झाला तरच गावात पेढे वाटून आनंद साजरा करायचे पण, आता तो काळ राहिलेला नाही. प्रत्येक घरात आता मुलीच्या जन्माच्या स्वागताचा सोहळा मोठ्या उत्साहात साजरा करीत आहेत आणि का करू नये ? मुलगी म्हणजे घरची लक्ष्मी असते. तिच्या इवल्याश्या सोन पावलांनी येऊन ती घरदार समृध्द करते. मुलगी म्हणजे घरातील चैतन्याचा व उत्साहाचा झरा असतो.
माणकी, (ता.माळशिरस) येथील अमोल रणनवरे व सौ. सविता रणनवरे यांना कन्यारत्न झाले. काल शंकरराव अनंतराव रणनवरे (सर) त्यांच्या नातीचे आणि डॉ. शिरीष शंकरराव रणनवरे यांच्या पुतणीचे घरामध्ये मोठ्या उत्साहात व आनंदमय वातावरणात स्वागत करण्यात आले. हालगीचा कडकडाट, फटाक्यांची आतिषबाजी आणि फुलांच्या पायघड्या घालून सुवासिनीनी औक्षण करून उंबऱ्यावर ठेवलेल्या कुंकवाच्या पहिल्या पावलाची खूण पांढऱ्या वस्त्रात उमटवून मुलीला घरात घेण्यात आले. अशा आनंदी वातावरणात रणनवरे कुटुंबातील सर्व सदस्य, नातेवाईक यांच्या उपस्थितीत मुलीचे घरी आल्यानंतर भव्यदिव्य स्वागत करण्यात आले.
पुर्वीच्या काळी मुलगा झाला आहे म्हणाले की, वंशाला दिवा झाला म्हणून संपुर्ण घर आनंदीत होत होते पण, आज समाजात मुलींच्या जन्माची संख्या घटत आहे. त्यामुळे आता मुलगी झाली ओ… म्हणाले तरी त्या घरात आनंदी वातावरण होत असल्याचे माळशिरस तालुक्यात पहायला मिळत आहे. याचे जिवंत उदाहरण काल माणकी येथे दिसून आले.
आजकाल मुली कुठल्याही क्षेत्रात कमी नाहीत. भारतीय सैन्य दलात कार्यरत आहेत. हवाई दलात पायलट होऊन विमान चालवत आहेत. काही डॉक्टर होऊन वैद्यकीय क्षेत्र संभाळत आहेत, तर काही अभियांत्रिकी पदवीधर होऊन मोठ्या क्षेत्रात कार्यरत आहेत. एक स्त्री नोकरी करत करत घर सांभाळते सगळी नाती जपते. त्यामुळे ती पुरुषांपेक्षा कितीतरी पटीने जास्त काम करते. त्यामुळे घरी मुलगी जन्माला येणे हे भाग्यवान असल्याचं लक्षण आहे. – डॉ. ज्योती रणनवरे, शंकरनगर, ता. माळशिरस.
नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.
