सवलतींचा लाभ घेण्यासाठी एनसीएमसी स्मार्ट कार्ड काढण्याचे आवाहन
बारामती (बारामती झटका)
महाराष्ट्र राज्य मार्ग परिवहन महामंडळाच्या (एसटी) विविध प्रवास सवलत योजनांचा लाभ घेण्यासाठी पात्र प्रवाशांनी एनसीएमसी स्मार्ट कार्ड काढून घ्यावे, असे आवाहन बारामती आगाराचे भरत लकडे यांनी केले.
पुणे जिल्हा माहिती कार्यालयाच्या वतीने गणेशोत्सवानिमित्त आयोजित ‘लोकसंवाद-२०२६’ उपक्रमांतर्गत इंदापूर चौकातील आझाद तरुण मंडळ येथे आयोजित कार्यक्रमात श्री. लकडे मार्गदर्शन करत होते. यावेळी नागरिक, महिला व गणेश मंडळाचे पदाधिकारी उपस्थित होते.
एसटी महामंडळामार्फत महिलांना अर्ध्या तिकिटाची सवलत, ज्येष्ठ व अतिज्येष्ठ नागरिकांना प्रवास सवलतीसह विविध पुरस्कारप्राप्त व्यक्ती, खेळाडू, आजी-माजी विधानमंडळ सदस्य व त्यांचे साथीदार तसेच अन्य पात्र लाभार्थ्यांना नियमानुसार प्रवास सवलत देण्यात येते. ७५ वर्षांवरील अमृत ज्येष्ठ नागरिकांना महाराष्ट्रात मोफत प्रवासाची सवलत उपलब्ध असल्याचे श्री. लकडे यांनी सांगितले.
सवलत योजनांचा लाभ घेण्यासाठी एनसीएमसी स्मार्ट कार्ड आवश्यक असून कार्ड काढण्यासाठी आधार कार्ड व संबंधित व्यक्तीची प्रत्यक्ष उपस्थिती आवश्यक आहे. पात्र प्रवाशांनी लवकरात लवकर स्मार्ट कार्ड काढून घ्यावे, असे आवाहन त्यांनी केले. ‘लोकसंवाद-२०२६’च्या माध्यमातून नागरिकांना एसटीच्या विविध सवलत योजना व स्मार्ट कार्ड प्रक्रियेची माहिती देण्यात आली.
नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.
