बारामती येथे प्रशासनाकडून माजी पंतप्रधान इंदिरा गांधी यांना जयंतीनिमित्त अभिवादन; एकात्मता दिनाची शपथ

बारामती (बारामती झटका)
भारताच्या माजी पंतप्रधान स्व. इंदिरा गांधी यांच्या जयंतीनिमित्त बारामती प्रशासनाच्या वतीने उपविभागीय अधिकारी उत्तम दिघे यांनी त्यांच्या प्रतिमेस पुष्पहार अर्पण करून अभिवादन केले.
यावेळी राष्ट्रीय एकात्मता दिनानिमित्त उपस्थित अधिकारी व कर्मचाऱ्यांनी एकात्मतेची शपथ घेतली. इंदिरा गांधी यांच्या स्मृतींना अभिवादन करताना देशाची एकता, अखंडता आणि बंधुभाव जपण्याचा संकल्प करण्यात आला. राष्ट्रीय एकात्मता, सामाजिक सलोखा आणि देशाच्या प्रगतीसाठी प्रत्येक नागरिकाने आपले योगदान द्यावे, असे आवाहन यावेळी करण्यात आले.
भारताच्या पहिल्या महिला पंतप्रधान म्हणून स्व. इंदिरा गांधी यांचे नाव भारतीय इतिहासात सुवर्णाक्षरांनी लिहिले गेले आहे. त्यांचा जन्म १९ नोव्हेंबर १९१७ रोजी अलाहाबाद येथे झाला. त्या भारताचे पहिले पंतप्रधान पं. जवाहरलाल नेहरू यांच्या कन्या होत्या. इंदिरा गांधी यांनी १९६६ ते १९७७ आणि पुन्हा १९८० ते १९८४ या काळात पंतप्रधानपद भूषवले. त्यांच्या नेतृत्वाखाली देशाने अनेक ऐतिहासिक टप्पे पार केले. हरित क्रांतीमुळे भारत अन्नधान्याच्या बाबतीत स्वयंपूर्ण झाला. बँकांचे राष्ट्रीयीकरण, संस्थानिकांचे तनखे रद्द करणे यांसारखे धाडसी निर्णय त्यांनी घेतले.

१९७१ च्या भारत-पाक युद्धात त्यांच्या ठाम नेतृत्वामुळे बांगलादेशची निर्मिती झाली आणि भारताची ताकद जगाला दिसली. १९७४ मध्ये पोखरण येथे अणुचाचणी घेऊन भारताला अणुशक्ती राष्ट्रांच्या पंक्तीत बसवले.देशाच्या एकतेसाठी आणि अखंडतेसाठी त्या आयुष्यभर झटल्या. म्हणूनच त्यांच्या जयंतीनिमित्त १९ नोव्हेंबर हा दिवस ‘राष्ट्रीय एकात्मता दिन’ म्हणून साजरा केला जातो.
जात, धर्म, भाषा, प्रांत यापेक्षा देश प्रथम ही भावना प्रत्येक नागरिकाच्या मनात रुजावी, हा या दिवसाचा मुख्य संदेश आहे.३१ ऑक्टोबर १९८४ रोजी त्यांची हत्या झाली. मात्र त्यांचे कणखर नेतृत्व, दूरदृष्टी आणि देशप्रेम आजही अनेक पिढ्यांना प्रेरणा देत आहे.
नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.



