माळेगांव (बारामती झटका) (लोकमत साभार)
माळेगांव सहकारी साखर कारखाना निवडणुकीची मतमोजणी बुधवारी (दि. २५) सलग दुसऱ्या दिवशी देखील सुरु आहे. पहिल्याच निकालात राज्याचे उपमुख्यमंत्री अजितदादा पवार यांनी बाजी मारली आहे.
उपमुख्यमंत्री अजितदादा पवार यांनी माळेगांव कारखान्याच्या निवडणुकीत ‘ब’ वर्गातुन दणदणीत विजय मिळवला. उपमुख्यमंत्री पवार यांच्यासह ९ उमेदवार त्यांच्या गटाचे निवडुन आले आहेत. तर सहकार बचाव पॅनलचे नेते, माळेगांव चे माजी अध्यक्ष रंजनकुमार तावरे पराभूत झाले आहेत. त्यामुळे अजितदादा पवार हे माळेगांवचा गड राखण्यात यशस्वी झाल्याचे मानले जात आहे. उपमुख्यमंत्री अजितदादा पवार यांच्या रुपाने माळेगांवला नवा कारभारी मिळाला आहे. तर शरद पवार गटाची पिछाडी कायम आहे.
त्यानंतर त्यांच्याच गटाचे अनुसुचित जाती व जमाती प्रवर्गातून रतनकुमार भोसले यांना ८६७० मते मिळाली, तर विरोधी गटाचे उमेदवार बापुराव गायकवाड यांना ७१८३ मते मिळाली. भोसले हे १४८७ मतांच्या फरकाने विजयी झाले आहेत.
मागास प्रवर्गातून नितीन शेंडे यांना ८४९४ मते मिळाली. तर सहकार बचाव पॅनलचे रामचंद्र नाळे यांना ७३४१ मते मिळाली. शेंडे यांचा ११५३ मतांनी विजय झाला. भटक्या विमुक्त जाती जमती प्रवर्गातून विलास देवकाते आणि महिला राखीवमधून संगीता कोकरे आणि ज्योती मुलमुले या विजयी झाल्या आहेत. देवकाते यांचा २२२७ मतांनी विजय झाला आहे. बाळासाहेब तावरे, शिवराजराजे जाधवराव, राजेंद्र बुरुंगले निवडून आले आहेत. तर विरोधी गटाचे नेते रंजन तावरे पराभूत झाले आहेत.
माळेगाव सहकारी साखर कारखान्याच्या निवडणुकीसाठी प्रशासकीय भवन बारामती येथे मतमोजणी पार पडत आहे. या मध्ये ‘ब’ वर्ग प्रतिनिधीची मतमोजणी प्रारंभी झाली ज्यात उपमुख्यमंत्री अजितदादा पवार हे उमेदवार होते. प्रथम ‘ब’ वर्गासाठी मतमोजणी झाली. या वर्गात ९९ टक्के मतदान झाले होते. अपेक्षेप्रमाणे सर्व संस्थावर उपमुख्यमंत्री अजितदादा पवार यांचे वर्चस्व असल्यामुळे त्यांना १०१ त्यापैकी तब्बल ९१ एवढी मते पडली तर विरोधी सहकार बचाव पॅनलच्या उमेदवारांना १० एवढीच मते मिळाली.
अजितदादा पवार गटाचे योगेश जगताप, तानाजी कोकरे, स्वप्नील जगताप, गणपतराव खलाटे, प्रताप आटोळे, सतीश फाळके, अविनाश देवकाते, जयपाल देवकाते, देविदास गावडे हे उमेदवार आघाडीवर आहेत. तर तावरे गटाचे चंद्रराव तावरे, रणजित खलाटे हे दोन उमेदवार आघाडीवर आहेत.
नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.
