बार्शीकरांच्या अस्मितेचा पुण्यात सन्मान! आमदार राजेंद्र राऊत यांचा भव्य नागरी सत्कार; ९ ऑगस्टला निगडीत स्नेहमेळावा

पुणे, पिंपरी-चिंचवड परिसरातील बार्शीकरांसाठी स्नेह, संवाद आणि आपलेपणाचा विशेष सोहळा

पुणे (बारामती झटका)

सोलापूर जिल्हा विधानपरिषदेवर आमदार म्हणून निवड झाल्याबद्दल आमदार राजेंद्र राऊत यांचा भव्य नागरी सत्कार तसेच पुणे, पिंपरी-चिंचवड व परिसरात वास्तव्यास असलेल्या बार्शीकरांचा भव्य स्नेहमेळावा रविवार, दि. ९ ऑगस्ट रोजी सायंकाळी ४ वाजता निगडी येथील सीझन्स बँक्वेट अँड लॉन्स येथे आयोजित करण्यात आला आहे.

सोलापूर जिल्हा मित्र मंडळ, पुणे यांच्या वतीने आयोजित या विशेष सोहळ्यात केंद्रीय राज्यमंत्री मुरलीधर मोहोळ, उच्च व तंत्र शिक्षण मंत्री चंद्रकांत पाटील, महिला व बालविकास मंत्री माधुरी मिसाळ आणि पिंपरी-चिंचवड महापालिकेचे महापौर रवि लांडगे यांच्या शुभहस्ते आमदार राजेंद्र राऊत यांचा नागरी सत्कार करण्यात येणार आहे.

या सोहळ्यास खासदार मेधा कुलकर्णी, आमदार सुनील कांबळे, महेश लांडगे, शंकर जगताप, हेमंत रासने, सिद्धार्थ शिरोळे, मिमराव तापकीर, राणाजगजितसिंह पाटील, राहुल कुल, विधानपरिषद सदस्य उमा खापरे, योगेश टिळेकर, अमित गोरखे तसेच ह.भ.प. डॉ. जयवंत महाराज बोधले यांची प्रमुख उपस्थिती लाभणार आहे.

बार्शीची माती, बार्शीची माणसं आणि बार्शीची नाळ… पुण्यात पुन्हा एकदा एकत्र येणार! पुणे व पिंपरी-चिंचवड परिसरात विविध क्षेत्रांत कार्यरत असलेल्या बार्शीकरांना एकाच व्यासपीठावर आणून परस्पर संवाद, स्नेह आणि सामाजिक बांधिलकी अधिक दृढ करण्याच्या उद्देशाने या स्नेहमेळाव्याचे आयोजन करण्यात आले आहे.

नव्याने निवडून आलेल्या आमदार राजेंद्र राऊत यांचा गौरव करण्याबरोबरच बार्शीकरांच्या आपुलकीच्या नात्याला उजाळा देणारा हा सोहळा ठरणार आहे. विविध राजकीय, सामाजिक, शैक्षणिक, धार्मिक आणि उद्योग क्षेत्रातील मान्यवरांच्या उपस्थितीमुळे या कार्यक्रमाला विशेष महत्त्व प्राप्त झाले आहे.

बार्शीपासून दूर असलो तरी बार्शीशी असलेली नाळ कायम आहे… हीच भावना घेऊन पुणे, पिंपरी-चिंचवड आणि परिसरातील बार्शीकरांनी या स्नेहमेळाव्यास मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.

नवनवीन बातम्या व ताज्या घडामोडी पाहण्याकरिता बारामती झटका, संपादक – श्रीनिवास कदम पाटील, ९८५०१०४९१४ हा नंबर आपल्या व्हाट्सअप ग्रुपमध्ये समाविष्ट करावा.